[ قروب نواف بيك ]: العيد هالسنة عندي .. ماله طعم !!

[نواف بيك البريدية]

أشين شي بالعيد أنك تشخّص بالثوب اللي توّك مفصّلة واذا قضى العيد تكتشف أن فيه وصخ من ورى وتوّك تنتبه له ههههههههههههههههههههههههه

السنة ذي عيدي مدري وش يبي .. اجل نايمن بدري على بالي إذا انتهى العيد وقضى ماأتعب وارقد على كنبة الصالة ... واللي صار اني رقدت مبتسّر يعني على حدود الساعة 1 ويوم أذّن الفجر واقوم اركض واخذي لي مروش " سبشل حق العيد " .. عاد لذاك المروش شارين شمبو للشعر الناعم هههههههههه .. ابي بعمري ولو مرة وحده استخدم حق اللي شعورهم ناعمه .. من طلعت على الدنيا وانا استخدم ذاك المخيس حق الشعور المتقصفه .. ويوم خذت لي المروش وطلعت بعصاقيلي للصالة ويهفّني ذاك البرد اللي مدري من وين دخل ههههههههههه الله حسيبه يوم روعني .. والله اني احسّ بصوته التسلب وهو يدخل .. اعنبوه ابن كلب مادخل إلا باحلك الضروف وأهمّ الأوقات الإجتماعية .. المهم اني فكّيت قرطاسة فنيلتي وقرطاسة صروالي .. ثم خلعت ثوبي من معلاقه وطقّيت الشماغ وحشحشته بدهن العود .. سارقن ربع توله من ابوي جايته هديه من اخو معزبته الجديده ياااااجعله يطلّتزها وتفرح اميمتي وترقد ذاك اليوم بليّا جاره

هو انا بس شخّصت .. قعدت اتمسمس قدّام المرايه ثلاثة وستين مره .. ياهي ملّت من وجهي ذا المراية .. شكلها تقول : ياخي انقلع الله يرحم امك وقسم بالله ياذا العيد حوّم تسبدي بمقابلك ..

ويوم اني تشخّصت وتزهلقت وصرت كما الفستان النفّاش اللي كله لمعة وتلامع .. طقني التثاوب .. وكل شوي فاتحن خشتي .. والنوم يتداواني وكنّه يقول : امزع راسك على المخده والله ماينفعك أحد .. لاعمّك فهد والا خالك ناصر .. يارجال نم وريّح راسك .. وكل شوي اتردد .. ودي اروح ارقد وودي ارتزّ مع الناس واكرف هالخلاقين اللي علي وشاريها ومتكلّفن فيها .. اجل مفصّلن ثيابي قبل رمضان عشان العيد ويوم جا العيد ما أظهر بها قدّام الناس واوريهم كشختي .. ابوها من حاااااالة ..

وكل شوي اتعوّذ من الشيطان ابيه يذلف عني واسكّر فمي اللي صار فضيحة قدّام خلق الله وكل مافتحته قاموا العالم يتفرجون عليه .. حتى ان ولد خالتي الله يقطع بليسه ارسل لي رسالة جوال وانا بالمجلس معه كاتبن فيها : ياخي حشوة سنك الايمن ماش .. ماصلحها الدكتور زين هههههههههه

جا خالي حمد وحطّ الفاكهة بالمجلس والتفت علي وقال : وش رايك توزّع على الشيبان من هالبردقان المصري عشان يحرّتس ضروسهم .. ياربييييه .. وش هالناس اللي تبي بس متى ينتهي رمضان عشان تاكل بنهاره .. وآخذ الصحون والسكاكين ونفسي تراودني اني اطعّن لي كم واحدن من هالشيبان انتقاماً منهم .. اجل كرف كرف كرف على طول : (.. مايقدّرون شي اسمه " ثوب وشماغ وشخصية ومرزام مايل " .. مايقدرون صروالي المتعرفط من تحت وفنيليتي اللي يالله سكّرت سرّي ..

واخذ بردقانه واشلخها شلختين واعطي وحدتن لجدّي .. والشلخه الثانية من الجوع قلت بها وانا واقف .. خالي يطالعني بعين وكنّه يقول : يامن شرى له من حلاله علّه ههههههههه ..

رجعت لمكاني .. وماأمداني اتنفّس هوا البيت المخيس اللي مليان ريحة غنمنا اللي حاشرينها بالحوش اللي جنبنا إلا وعمي اللي توّه بزر وعمره ( 16 سنة ) يقول لي : شلونك ياولد اخوي .. عساك طيب !
انا داري وش قصده .. على باله يبي يعلّم الضيوف انه عمي .. عاد الله من الحقران .. من عرفته بهالدنيا وانا اكرفه وماقد قلت له ياعمي .. يهبا هو ووجهه هاللي من طوله كنّه يوم السبت .. والله قهر .. بزر وتوّه ماشّن خشمه بفنيلته وصار عمّي .. الله يسامحك يابوي .. ياليتك يوم جيت على الدنيا رحت وكلّمت جدّي وقلت له يحسّن النسل ويوقف بزارين .. اجل عنده اربعة دفاتر عايلة ويقول اني ماجبت شي يبيّض الوجه .. ياحلالات بس من ياخذ دفاتر العايلة اللي عندك ويساهم بها ببنك البلاد

نرجع لزات السالوفة ,

شوي ويرجع منوال " التثاوب وحب النوم " .. كل شوي افقّ ثمي ثلاثة متر وانا اتعوّذ من الشيطان واقول : ياربيييه متى ينتهي العيد واروح ارقد : (... وش هالعيد اللي مدري وش يبي ...
بصراحة اقدر أقول عن هالسنة أن عيدي : ماش .. مهوب عيد .. بس اللي يهونها أني كسبت الجولة وقزّيت بنت خالتي من ورى باب الصالة !

جا ولد عمتي من الرياض .. طبعاً ولد عمتي هو خويي وصقيقي وحبيبي وهو كل شي بحياتي .. كل شيّن به زين .. اللهم إنه مفارق الزين بوجهه !
ماعلينا .. اهم شي اني احبه ..

سلّم على الشيبان ويوم جا عندي وسلّم علي .. قال باذني : مدمن .. مدمن ياخي ورى ثوبك منشقّ من تحت ومسوّد ..

هوه ,, وش هو !
وش اللي منشقّ ياحمد ؟
انت صادز والا تستبهل وخافّن عقلك من تالي ..
ويوم سلمت عليه وشفت ان مافيه احد يطالع فيني .. نزّلت راسي على تحت واشوف ذاك الشقّ اللي أكبر من شقّ راس خويي راشد !
شقّن مورّم من كل جهه .. وبه سوادن عظيم !
اثاريه شرخن لاعبن بثوبي ومادريت عنه !
وانا اللي اتذكّر العلم الماخوذ .. اثاريني ياحبني لي لاعبن البارح مع مبزرة بيتنا ومطامرن معهم بالملحق على هالشروخ !
يادافع البلا بس ..
لا ومن زين وجهي حاطّن رجل على رجل بالمجلس .. وكنّي اقول للناس لايفوتكم ثوبي من تحت
يااااااااااااوك .. توني مشخّصن بثوبي وماأمداني مير البسه إلا وانتهى !
وش اسوي .. المشكلة ان طلعت شافوه وان انطقيت بمكاني شافوه ! .. ياربييه وش ذا العيد الامحق !

واقعد اتذكّر .. ورى جار جدّي ذاك الملحّى الشايب كل ماطالع فيني قام يتبوسم ويوزّع خشّته بكل مكان .. اثاريه شايفن الشلخ الله يشلخ راس العدو .. وانا احسب انه حابّني ومُعجبن فيني وكل ماحط عينه بعيني صديت عنه عملاً بالمثل اللي يقول : لاشفت عين الغزال ترويك ، صدّ عنها لاتاكلك ثم ترميك !

نغزني الوالد وقال : قم صب القهوه مع عيال عمّك ..
وش اسوي .. !
شلخن وش كبره شاقّن اطراف الثوب .. ونوم يرفسني مع كل صوب ..
قمت وقطعت المجلس طول وعرض .. وطلعت مع الباب واستاذنت من الوالد وقلت : بروح اسلّم على عماتي ..
سلّمت على الاولى والثانية والسابعة والعاشرة .. ومازلت أسلّم .. !
يوم وصلت للي رقمها 13 .. وقّفت شوي والتفت على عمتي القريبة مني وقلت : آلحين ماودكم تجون للعيد دفعات .. وراكم جايين كلكم ماشالله . والا عشان بسّ تكلّفون علينا وتخلوننا نتعب وانا نسلّم
سبحان الله .. من كثرهم صرت ماعرفهن إلا بحبّات الخال .. وحدتن حبّة خالها على خشمها والثانية على خدّها والثالثة تحت براطمها .. وتقول ان جمالية حبّة الخال ماتكمل إلا إذا صارت تحت البراطم .. الله من الهلس عندها بعد
بوم سلمت عليهن كلهن وقضيت رحت للمجلس وانا مارّ شفت لي مكتب استقدام كامل متكامل في المطبخ ! .. مدري ليش احنا عايشين على الشغالات .. ! مدري متى باشوف حريمنا هم اللي مرفّعين كمومهن ويفركن بقدور الطبخ !

دخلت المجلس ,, وانا مابي حيل ,, !
ابي اتمغّط ,, ابي احسس اللي حولي اني معهم ,, أبيهم يحسّون اني مازلت مثلهم متعيّد ومبسوط واحسّ بالناس اللي تسلّم
أفواج تدخل وأفواج تطلع ,, وانا مبوبزن على الكنبه احتري عمي إبراهيم يقول كلمته السنوية الختامية ( ياجعله عيدن دايمن علينا ، يالله خلونا نتغدى ) .. بس مدري ليش هالسنة تأخرت الكلمة

ويوم عاد حسيت أني وصلت لأقصى مراحل استمراريتي الحياتيه واللي بعدها بثواني يمكن افصل وتصير مني حركات مُش ولابُد عند الناس واعلى مافي خيرهم يركبونه ,, لأني إذا فصلت وجاني النوم ماعاد افكّر باحد .. يعني يمكن اسوي حركة مهوب زينه واقوم قدّام الضيوف وافصخ ثوبي واعلّقه وانسدح على الكنبه ,, كلللللل شي واردن مني بهاللحظات !

وتخمني فكرة اني اسولف على اللي حولي غديني امسك نفسي قبل افصل ,, ماعاد باقي شي والناس كنّها بدت تذلف ,,
وتجي في بالي سالفة قديمة صارت لي مع واحدن من ربعي ,, عاد انا ابي اذكر تفاصيلها عشان اقولها .. بس ماش .. المحركات عندي اغلبها تعطّلت وماعاد فيه شي يساعدني إلا لساني ونفسي ,, وانا اللي استلم المجلس واقعد اسولف عليهم .. قسمن بالله ماأذكر وش اني قلت بس اذكر ان خالي ناصر فشّلني قدّام الناس والضيوف اللي مالين المجلس وقال لي بصوته المرتفع : ماتلاحظ ان سالفتك ذي تسذبتن وش كبرها وانك قايلن لي امس نفس السالفة بس بشكل ثاني !
أنا هنا ماعاد قويت افتّح عيوني فضلاً أني أقدر أرد والا أواصل بتسذبتي والا ارقّعها ,
صرت ياحبني لي قايلن لخالي السالفة من البارح بس اني نسيت اني قايلها له ونسيت بعد وش هي السالفة وحاولت اني امسّ روحي شوي عشان اشارك غيري العيد واحسسهم اني معهم واني في جوّهم ومبسوط ,,

--

مايستفاد من التعلوم ,,,

* إذا صار عندك عمّات وعمّان وش كثرهم لاتحرص تتعيّد معهم وقل انه جاك صداع نصفي وغصيت بحبّة بندول واسحب عليهم اريح لك .

* لاتشبون شروختكم إلا بثالث العيد .. لا ولاحدن يلعب مع بزارين وقسم بالله انهم نكبه

* اللي يقول ان احسن مكان لحبة الخال تحت البراطم تسذوب , اللي سمعت انه احسن مكان ورى الاذن ( وجه يقول اتحدا احدن يشوف وش ورى اذنه )

* إذا صرت تبي تواصل للعيد وماودك تناك فخذ معك مغذّي والا ولّم سالفتك من دون تسذب عشان مايجيك واحدن ويفضحك قدّام خلق الله ويصير وجهك مثل تمرة البرحي

* أحسن شي بالعيد انك تلبس فنيلتك وصروالك دوغري من الكيس عشان تحسّ بالعيد .. اجل احطّ في فنيلة ريلين عشان اكويها وماحدن شايفها إلا أنا


*
*
*

كل عام وانتم بخير [عزيزي الزائر يتوجب عليك التسجيل للمشاهدة الرابطللتسجيل اضغط هنا]

[سميتك غلاي]

هههههههههههههههههههههههههههههه


الصراحه يا حلاة العيد جي

نكته وتحفة


اتريا قصته بعيد الاضحى خخ




يسلمووو

لا عدمناك


سميتك غلاي

[الملكة00]

،،

هههههههههههههه ذكرتني بيوم العيد وزحمة العيد

وأكثر زحمة بالعيد الأطفال لا جاك واحد وقالك من العايدين
عاد وقتها ياويلك لو ما أعطيته العيدية وانتبة لازم تكون فلوس أما لو كانت حلاوة
ابعد من قدامه لا يصكك فيها خخخخخخخخ

،،

مشكوووووووورة مدمن على هالموضوع

،،

بإنتظار عيدك بعيد الأضحى

،،

[الألماسة00]

تووووووووووووووووووووووحفة هالعيد


الله يجعل ايامك كلها عيد ولا اقلبها ههههه

[مــجــافي]

الله يجعل ايامك كلها عيد